faiz ahmad faiz Gazal

Ab Wahi Harf-e-Junun Sab Ki Zaban Thahri Hai

Ab vahi harf-e-junun sab ki zaban Thahri hai

Jo bhi chal nikli hai vo baat kahan Thahri hai

Aaj tak shaiḳh ke ikram men jo shai thi haram

Ab vahi dushman-e-din rahat-e-jan Thahri hai

Hai ḳhabar garm ki phirta hai gurezan naseh

Guftugu aaj sar-e-ku-e-butan Thahri hai

Hai vahi ariz-e-laila vahi shirin ka dahan

Nigah-e-shauq ghadi bhar ko jahan Thahri hai

Vasl ki shab thi to kis darja subuk guzri thi

Hijr ki shab hai to kya saḳht giran Thahri hai

Bikhri ik baar to haath aai hai kab mauj-e-shamim

Dil se nikli hai to kab lab pe fuġhan Thahri hai

Dast-e-sayyad bhi aajiz hai kaf-e-gul-chin bhi

Bū-e-gul Thahri na bulbul ki zaban Thahri hai

Aate aate yunhi dam bhar ko rukī hogi bahar

Jaate jaate yūñhī pal bhar ko ḳhizan Thahri hai

Ham ne jo tarz-e-fuġhan ki hai qafas meñ ījād

‘Faiz’ gulshan meñ vahī tarz-e-bayan Thahri hai

  • Article By :
    Real Shayari Ek Koshish hai Duniya ke tamaan shayar ko ek jagah laane ki.

Random Posts

Leave a Reply

Your email address will not be published. Required fields are marked *

*
*