Ahmad faraz

Bhed paa.eñ to rah-e-yār meñ gum ho jaa.eñ

Varna kis vāste bekār meñ gum ho jaa.eñ

Kyā kareñ arz-e-tamannā ki tujhe dekhte hī

Lafz pairāya-e-iz.hār meñ gum ho jaa.eñ

Ye na ho tum bhī kisī bhiiḌ meñ kho jaao kahīñ

Ye na ho ham kisī bāzār meñ gum ho jaa.eñ

Kis tarah tujh se kaheñ kitnā bhalā lagtā hai

Tujh ko dekheñ tire dīdār meñ gum ho jaa.eñ

Ham tire shauq meñ yuuñ ḳhud ko gañvā baiThe haiñ

Jaise bachche kisī tyauhār meñ gum ho jaa.eñ

Pech itne bhī na do kirmak-e-resham kī tarah

Dekhnā sar hī na dastār meñ gum ho jaa.eñ

Aisā āshob-e-zamāna hai ki Dar lagtā hai

Dil ke mazmūñ hī na ash.ār meñ gum ho jaa.eñ

Shahryāroñ ke bulāve bahut aate haiñ ‘Farāz’

Ye na ho aap bhī darbār meñ gum ho jaaeñ

By Real Shayari

Real Shayari Ek Koshish hai Duniya ke tamaan shayar ko ek jagah laane ki.

Leave a Reply

Your email address will not be published. Required fields are marked *