BaiThe the log pahlū-ba-pahlū piye hue
Ik ham the terī bazm meñ aañsū piye hue
Dekhā jise bhī us kī mohabbat meñ mast thā
Jaise tamām shahr ho daarū piye hue
Takrār be-sabab to na thī rind o shaiḳh meñ
Karte bhī kyā sharāb the har do piye hue
Phir kyā ajab ki log banā leñ kahāniyāñ
Kuchh maiñ nashe meñ chuur thā kuchh tū piye hue
Yuuñ un laboñ ke mas se mo.attar huuñ jis tarah
Vo nau-bahār-e-nāz thā ḳhushbū piye hue
Yuuñ ho agar ‘farāz’ to tasvīr kyā bane
Ik shaam us ke saath lab-e-jū piye hue
Ajab junūn-e-masāfat meñ ghar se niklā thā
Khabar nahīñ hai ki sūraj kidhar se niklā thā
Ye kaun phir se unhīñ rāstoñ meñ chhoḌ gayā
Abhī abhī to azāb-e-safar se niklā thā
Ye tiir dil meñ magar be-sabab nahīñ utrā
Koī to harf lab-e-chāragar se niklā thā
Ye ab jo aag banā shahr shahr phailā hai
Yahī dhuāñ mire dīvār-o-dar se niklā thā
Maiñ raat TuuT ke royā to chain se soyā
Ki dil kā zahr mirī chashm-e-tar se niklā thā
Ye ab jo sar haiñ ḳhamīda kulāh kī ḳhātir
Ye aib bhī to ham ahl-e-hunar se niklā thā
Vo qais ab jise majnūñ pukārte haiñ ‘Farāz’
Tirī tarah koī dīvāna ghar se niklā thā..
Avval avval kī dostī hai abhī
Ik ġhazal hai ki ho rahī hai abhī
Maiñ bhī shahr-e-vafā meñ nau-vārid
Vo bhī ruk ruk ke chal rahī hai abhī
Maiñ bhī aisā kahāñ kā zūd-shanās
Vo bhī lagtā hai sochtī hai abhī
Dil kī vāraftagī hai apnī jagah
Phir bhī kuchh ehtiyāt sī hai abhī
Garche pahlā sā ijtināb nahīñ
Phir bhī kam kam supurdagī hai abhī
Kaisā mausam hai kuchh nahīñ khultā
Būñdā-bāndī bhī dhuup bhī hai abhī
Khud-kalāmī meñ kab ye nashsha thā
Jis tarah rū-ba-rū koī hai abhī
Qurbateñ laakh ḳhūb-sūrat hoñ
Dūriyoñ meñ bhī dilkashī hai abhī
Fasl-e-gul meñ bahār pahlā gulāb
Kis kī zulfoñ meñ Tāñktī hai abhī
Muddateñ ho ga.iiñ ‘Farāz’ magar
Vo jo dīvāngī ki thī hai abhī
Ajab junūn-e-masāfat meñ ghar se niklā thā
Khabar nahīñ hai ki sūraj kidhar se niklā thā
Ye kaun phir se unhīñ rāstoñ meñ chhoḌ gayā
Abhī abhī to azāb-e-safar se niklā thā
Ye tiir dil meñ magar be-sabab nahīñ utrā
Koī to harf lab-e-chāragar se niklā thā
Ye ab jo aag banā shahr shahr phailā hai
Yahī dhuāñ mire dīvār-o-dar se niklā thā
Maiñ raat TuuT ke royā to chain se soyā
Ki dil kā zahr mirī chashm-e-tar se niklā thā
Ye ab jo sar haiñ ḳhamīda kulāh kī ḳhātir
Ye aib bhī to ham ahl-e-hunar se niklā thā
Vo qais ab jise majnūñ pukārte haiñ ‘Farāz’
Tirī tarah koī dīvāna ghar se niklā thā
Agarche zor havāoñ ne Daal rakkhā hai
Magar charāġh ne lau ko sambhāl rakkhā hai
Mohabbatoñ meñ to milnā hai yā ujaḌ jaanā
Mizāj-e-ishq meñ kab e’tidāl rakkhā hai
Havā meñ nashsha hī nashsha fazā meñ rañg hī rañg
Ye kis ne pairahan apnā uchhāl rakkhā hai
Bhale dinoñ kā bharosā hī kyā raheñ na raheñ
So maiñ ne rishta-e-ġham ko bahāl rakkhā hai
Ham aise sāda-diloñ ko vo dost ho ki ḳhudā
Sabhī ne vāda-e-fardā pe Taal rakkhā hai
Hisāb-e-lutf-e-harīfāñ kiyā hai jab to khulā
Ki dostoñ ne ziyāda ḳhayāl rakkhā hai
Bharī bahār meñ ik shāḳh par khilā hai gulāb
Ki jaise tū ne hathelī pe gaal rakkhā hai
‘Farāz’ ishq kī duniyā to ḳhūb-sūrat thī
Ye kis ne fitna-e-hijr-o-visāl rakkhā hai
Ab kyā socheñ kyā hālāt the kis kāran ye zahr piyā hai
Ham ne us ke shahr ko chhoḌā aur āñkhoñ ko muuñd liyā hai
Apnā ye sheva to nahīñ thā apne ġham auroñ ko sauñpeñ
Khud to jāgte yā sote haiñ us ko kyuuñ be-ḳhvāb kiyā hai
Khilqat ke āvāze bhī the band us ke darvāze bhī the
Phir bhī us kūche se guzre phir bhī us kā naam liyā hai
Hijr kī rut jāñ-levā thī par ġhalat sabhī andāze nikle
Taaza rifāqat ke mausam tak maiñ bhī jiyā huuñ vo bhī jiyā hai
Ek ‘Farāz’ tumhīñ tanhā ho jo ab tak dukh ke rasiyā ho
Varna aksar dil vāloñ ne dard kā rasta chhoḌ diyā hai
Jis ko dekho vahī zanjīr-ba-pā lagtā hai
Shahr kā shahr huā dāḳhil-e-zindāñ jānāñ
Ab tirā zikr bhī shāyad hī ġhazal meñ aa.e
Aur se aur hue dard ke unvāñ jānāñ
Ham ki rūThī huī rut ko bhī manā lete the
Ham ne dekhā hī na thā mausam-e-hijrāñ jānāñ
Hosh aayā to sabhī ḳhvāb the reza reza
Jaise uḌte hue aurāq-e-pareshāñ jānāñ
Ab ke ham bichhḌe to shāyad kabhī ḳhvāboñ meñ mileñ
Jis Tarah sūkhe hue ful kitāboñ meñ mileñ
DhūñDh ujḌe hue logoñ meñ vafā ke motī
Ye ḳhazāne tujhe mumkin hai ḳharāboñ meñ mileñ
Gham-e-duniyā bhī ġham-e-yār meñ shāmil kar lo
Nashsha baḌhtā hai sharābeñ jo sharāboñ meñ mileñ
Tū ḳhudā hai na mirā Ishq farishtoñ jaisā
Donoñ insāñ haiñ to kyuuñ itne hijāboñ meñ mileñ
Aaj ham daar pe khīñche ga.e jin bātoñ par
Kyā ajab kal vo zamāne ko nisāboñ meñ mileñ
Ab na vo maiñ na vo tū hai na vo maazī hai ‘farāz’
Jaise do saa.e tamannā ke sarāboñ meñ mileñ..
Ab aur kyā kisī se marāsim baḌhā.eñ ham
Ye bhī bahut hai tujh ko agar bhuul jaa.eñ ham
Sahrā-e-zindagī meñ koī dūsrā na thā
Sunte rahe haiñ aap hī apnī sadā.eñ ham
Is zindagī meñ itnī farāġhat kise nasīb
Itnā na yaad aa ki tujhe bhuul jaa.eñ ham
Tū itnī dil-zada to na thī ai shab-e-firāq
Aa tere rāste meñ sitāre luTā.eñ ham
Vo log ab kahāñ haiñ jo kahte the kal ‘Farāz’
He he ḳhudā-na-karda tujhe bhī rulāeñ ham
Ashiqī meñ ‘mīr’ jaise ḳhvāb mat dekhā karo
Bāvle ho jāoge mahtāb mat dekhā karo
Jasta jasta paḌh liyā karnā mazāmīn-e-vafā
Par kitāb-e-ishq kā har baab mat dekhā karo
Is tamāshe meñ ulaT jaatī haiñ aksar kashtiyāñ
Dūbne vāloñ ko zer-e-āb mat dekhā karo
Mai-kade meñ kyā takalluf mai-kashī meñ kyā hijāb
Bazm-e-sāqī meñ adab ādāb mat dekhā karo
Ham se durveshoñ ke ghar aao to yāroñ kī tarah
Har jagah ḳhas-ḳhāna o barfāb mat dekhā karo
Māñge-tāñge kī qabā.eñ der tak rahtī nahīñ
Yaar logoñ ke laqab-alqāb mat dekhā karo
Tishnagī meñ lab bhigo lenā bhī kaafī hai ‘Farāz’
Jaam meñ sahbā hai yā zahrāb mat dekhā karo