gajalb9

Bisāt-e-ijz meñ thā ek dil yak qatra ḳhuñ vo bhī

So rahtā hai ba-andāz-e-chakīdan sar-Nigūñ vo bhī

Rahe us shoḳh se āzurda ham chande Takalluf se

Takalluf bartaraf thā ek andāz-e-junūñ vo bhī

Khayāl-e-marg kab taskīñ dil-e-āzurda ko Baḳhshe

Mire dām-e-tamannā meñ hai ik said-e-zabūñ vo bhī

Na kartā kaash naala mujh ko kyā Mālūm thā Hamdam

Ki hogā bā.is-e-afzā.ish-e-dard-e-Darūñ vo bhī

Na itnā burrish-e-teġh-e-jafā par naaz farmāo

Mire dariyā-e-be-tābī meñ hai ik mauj-e-Khūñ vo bhī

Mai-e-ishrat kī ḳhvāhish sāqi-e-gardūñ se kyā kiije

Liye baiThā hai ik do chaar jām-e-vāzh-gūñ vo bhī

Mire dil meñ hai ‘ġhālib’ shauq-e-vasl o shikva-e-hijrāñ

Khudā vo din kare jo us se maiñ ye bhī kahūñ vo bhī

Mujhe ma.alūm hai jo tū ne mere haq meñ sochā hai

Kahīñ ho jaa.e jald ai gardish-e-gardūn-e-dūñ vo bhī

Nazar rāhat pe merī kar na va.ada shab ke aane kā

Ki merī ḳhvāb-bandī ke liye hogā fusūñ vo bhī…

By Real Shayari

Real Shayari Ek Koshish hai Duniya ke tamaan shayar ko ek jagah laane ki.

Leave a Reply

Your email address will not be published. Required fields are marked *