Ahmad Faraz

Dil Badan Ka Sharik-E-Haal Kahan

Dil badan kā sharīk-e-hāl kahāñ

Hijr phir hijr hai visāl kahāñ

Ishq hai naam intihāoñ kā

Is samundar meñ e’tidāl kahāñ

Aisā nashsha to zahr meñ bhī na thā

Ai ġham-e-dil tirī misāl kahāñ

Ham ko bhī apnī pā.emālī kā

Hai magar is qadar malāl kahāñ

Maiñ na.ī dostī ke moḌ pe thā

Aa gayā hai tirā ḳhayāl kahāñ

Dil ki ḳhush-fahm thā so hai varna

Tere milne kā ehtimāl kahāñ

Vasl o hijrāñ haiñ aur duniyā.eñ

In zamānoñ meñ māh-o-sāl kahāñ

Tujh ko dekhā to log hairāñ haiñ

Aa gayā shahr meñ ġhazāl kahāñ

Tujh pe likkhī to saj ga.ī hai ġhazal

Aa milā ḳhvāb se ḳhayāl kahāñ

Ab to shah maat ho rahī hai ‘Farāz’

Ab bachāv kī koī chaal kahāñ

  • Article By :
    Real Shayari Ek Koshish hai Duniya ke tamaan shayar ko ek jagah laane ki.

Random Posts

Leave a Reply

Your email address will not be published. Required fields are marked *

*
*