Bas-Ki Dushwar Hai Har Kaam Ka Aasan Hona

Bas-ki dushvār hai har kaam kā āsāñ honā

Aadmī ko bhī mayassar nahīñ insāñ honā

Girya chāhe hai ḳharābī mire kāshāne kī

Dar o dīvār se Tapke hai bayābāñ honā

Vā-e-dīvāngi-e-shauq ki har dam mujh ko

Aap jaanā udhar aur aap hī hairāñ honā

Jalva az-bas-ki taqāzā-e-nigah kartā hai

Jauhar-e-ā.ina bhī chāhe hai mizhgāñ honā

Ishrat-e-qatl-gah-e-ahl-e-tamannā mat pūchh

Id-e-nazzāra hai shamshīr kā uryāñ honā

Le ga.e ḳhaak meñ ham dāġh-e-tamannā-e-nashāt

Tū ho aur aap ba-sad-rañg-e-gulistāñ honā

 

Ishrat-e-pāra-e-dil zaḳhm-e-tamannā khānā

Lazzat-e-rīsh-e-jigar ġharq-e-namak-dāñ honā

Kī mire qatl ke ba.ad us ne jafā se tauba

Haa.e us zūd-pashīmāñ kā pashemāñ honā

 

Haif us chaar girah kapḌe kī qismat ‘ġhālib’

Jis kī qismat meñ ho āshiq kā garebāñ honā

We will be happy to hear your thoughts

Leave a reply