Ghair Len Mahfil Mein Bose Jam Ke

Ghair leñ mahfil meñ bose jaam ke

Ham raheñ yuuñ tishna-lab paiġhām ke

 

Khastagī kā tum se kyā shikva ki ye

HathkanDe haiñ charḳh-e-nīlī-fām ke

 

Khat likheñge garche matlab kuchh na ho

Ham to āshiq haiñ tumhāre naam ke

 

Raat pī zamzam pe mai aur sub.h-dam

Dho.e dhabbe jāma-e-ehrām ke

 

Dil ko āñkhoñ ne phañsāyā kyā magar

Ye bhī halqe haiñ tumhāre daam ke

 

Shaah ke hai ġhusl-e-sehhat kī ḳhabar

Dekhiye kab din phireñ hammām ke

 

Ishq ne ‘ġhālib’ nikammā kar diyā

Varna ham bhī aadmī the kaam ke

We will be happy to hear your thoughts

Leave a reply