Ab kyā socheñ kyā hālāt the kis kāran ye zahr piyā hai
Ham ne us ke shahr ko chhoḌā aur āñkhoñ ko muuñd liyā hai
Apnā ye sheva to nahīñ thā apne ġham auroñ ko sauñpeñ
Khud to jāgte yā sote haiñ us ko kyuuñ be-ḳhvāb kiyā hai
Khilqat ke āvāze bhī the band us ke darvāze bhī the
Phir bhī us kūche se guzre phir bhī us kā naam liyā hai
Hijr kī rut jāñ-levā thī par ġhalat sabhī andāze nikle
Taaza rifāqat ke mausam tak maiñ bhī jiyā huuñ vo bhī jiyā hai
Ek ‘Farāz’ tumhīñ tanhā ho jo ab tak dukh ke rasiyā ho
Varna aksar dil vāloñ ne dard kā rasta chhoḌ diyā hai